Mat 26 | ASO | STEP | Izesu' aza a'mine gamazi lo-ngeme osu' lo a'mine gamenelo' izipahala zuho ti' lo lo-ngimine':

Matthew 26

Gizebo Ve Ingine Izesu'ni Bililisa Gamazi Li Hukani' Gamazi

(Maleko' 14:1-2; Luka' 22:1-2; Zohane' 11:45-53)

1 Izesu' aza a'mine gamazi lo-ngeme osu' lo a'mine gamenelo' izipahala zuho ti' lo lo-ngimine': 2 Lingine mo gili nizani' ma neive. Isilaele' aleveti avotemote Aigita misubou' minani' gameneu' O'moso'mo isi'ine izingumu' gelo holise' mino noso' nite' naa' noune' gamene ma ne okozo' api' oloseive. Ne'mine ogo O'mosolati' ve gihile neze nene biluvaliti a'ningu' mili-nidikevo lohoto' zalo' nibili hililisave line'.

3 Ido' a'mine gameneu' nene eveneto' medeli mini O'moso inite' lehizi-daa' ave nabasi ido' eveneliti mono' gizebo ve'inesi igi eveneto' medelo mino O'moso inite' lehize-daa' ive naba gulive Kaiaha' ne'mi numu've nabau' igi di gese' ani'. 4 Di gese' igi gamazi li gele ha gele igi mini Izesu'ni nene zegeno bele helelone li lovo gizani'. 5 Ne'mine li lovo gizani'za holise' gameneu' nene evene' vai' di gese' igi ningi nizavo analo' dalone' nene lovo di soto' ikelizanako holiseku' nene alamolone li lani'.

Betania Ebeta Izesu'ni Nene Unuvo Laminekisi Uveli Vene' Mali'mo Holo-dine' Gamazi

(Maleko' 14:3-9; Zohane' 12:1-8)

6 Ido' Izesu' aza Betania numuda mino ganadise gozopo' ma gize dave Simoni' ne'mi numu'veu' neivo 7 minida nene vene' mali'mo luhuvo laminekisi gehenidunu' lili' ani' botolo' nene unuvo uveli lamine' meni've nabasi nene a'mingu' neivo do ogo Izesu' noso' nite' nonavo godololo' leke-dine'. 8 Ido' Izesu' izipahala zuho ingine ningi mulu'ningu' goloso ogo ngizebolo' molavo ti' li lani': Unuvo lamine' oga' ine' uveli nene nanitekumu' do labuluvo neive. 9 A'mine unuvo lamine' oga' ine' uveli nene do vo hizilizave ngemekunivo hizi moni naba limikevo a'mine moni nene goho' aleve ngimunidine. 10 Ti' li nilavo Izesu' aza gamazi lani' nene mo gelo ti' lo line': Vene' mene aza nanite' do goloso ogavosa geni'vesi gamazi nili-imave. Aza nene inite' lamine' noo-nidivo ede vive. 11 Lingine nene goho' alevesi mini di vi minikelizaha nezesi nene mudive ma mini di vi minamilisave. 12 Vene' aza a'mine unuvo lamine' oga' ine' uveli nene holo-nididi'mo galese izi-nidilizangumu' gomu' oko'ne nene do lamine' o-nedo holo-nedave. 13 Naza lamineto' lo-lengemeloze. Gililo. Mono' gamazi lamine' mene di misubou' misubou' moni li-ngimilizadaa eze guvele nene ha gili minilizave li aza inite' o-nidine' nemukisi li soto' igi li-ngimilizave.

Zuda' Aza Izesu'ni Do nGemelesuve Lo Lo Hukine' Gamazi

(Maleko' 14:10-11; Luka' 22:3-6)

14 Ne'mine ogavo Izesu' izipahala zuho tuvelu engikuti' Kelioto numudoti' ve ma gulive Zuda' aza eveneto' medeli mini O'moso inite' lehizi-daa' ave nabala vo ti' lo lo-ngimine': 15 A'mine ve ma nene naza do vo hulo vetingu' okuvo nanite' ma nimilizave. Lavo ingine siluva' moni teoti (30) ne'mine imani'. 16 Imikevo a'mine gameneloti' nene aza Izesu'ni ngelebizeli akamu' vise' o minine'.

O'moso'mo Isilaele' Aleve Ise'ine Ize-ngidingumu' Izesu' Izipahala Zuhosi Noso' Nite' Nani' Gamazi

(Maleko' 14:12-21; Luka' 22:7-14, 13:21-30)

17 Zuda vete lulu izamine' beleti naa' noune' holise' nene api' neivo Izesu' izipahala zuho ezela igi ti' li longo' i-dani': O'moso'mo avotemotine ise'ine ize-ngidingumu' gelo naa' noune' noso' nite' naliningumu' nene zala vo do va'va' o-gedelone lo nolane. 18 Likevo Izesu' aza nongimiselo ti' lo lo-ngimine': Numuno nabala vi a'mida lo-lingimuve ma neida vi ningi ti' li li-imilo: Tisa' ma'mo neni' gamene mo alitave lo a'mine O'moso'mo avotemotine ise'ine ize-ngidingumu' gelo mino naa' noune' noso' nite' nene gei' numungau' neni' izipaha'nesi nalone nolive. 19 Lo-ngemavo izipahala zuho ingine lo-ngimidi'mine igi a'mine noso' nite' di va'va' ani'. 20 Di va'va' ikevo mo nivenga' molavo Izesu' izipahala zuho tuvelu nesi mini noso' nite' nani'. 21 A'mine noso' nite' ni nizavo Izesu' aza ti' lo line': Lamineto' ma lo-lengemeloze. Gililo. Lengikuti' mali'mo nenikumu' me neive lo biluvaliti a'ningu' molaloseive. 22 A'mine gamazi nene lingumu' izipahala zuho mulumo goloso gili-di api' igi hamo' hamo' oti lani': Guvekasi ve, nenikumu' lamo nolosane. Olo. 23 Likevo Izesu' aza ti' lo lo-ngimine': Lapeseu' ana nenikisi hulo molave ne'mo biluvaliti a'ningu' do hulo-nedeleseive. 24 Ee, O'mosolati' ve gihile nenikumu' polohetelite gizi nizani' ma'mino heleloni' akalo' novuvoni'za biluvalite neni' dalizave lo do soto' o-nedelive nene agae, mulumo gono atoli'mine daloseinako nemu' a'mine ve aza izeleho ma gedamidiniko a'mine mulumo gono goloso soto' o-delesa neine' akalo' mine molo ma minamivo lamine' o minidine. 25 Ne'mine lavo Zuda' aza alinge' biluvaliti a'ningu' ele'mize molave'mo ti' lo line': Tisazo, nenikumu' nene ma lamane. Olo. Lavo Izesu' aza ti' lo lo-imine': O'ove. Gasika mo ne nolane lo line'.

Lebeni Inite' Api' Ogo nGimine' Gamazi

(Maleko' 14:22-26; Luka' 22:14-20; 11:23-25)

26 Noso' nite' ninavo Izesu' aza beleti do O'mosola opo'ni lo gito izipahala zuho nongemo ti' lo line': Di nalo. Mene neni' me'mele'ne ma ne neive. 27 Ne'mine lavo di nikevo vaini gomise do O'mosola opo'ni lo nongemo ti' lo line': A'mingu' nene O'moso'mo lo huko-lidine' gamazi nene do ele'vole' iline' vanise'ne mene evene' mukikumu' lihimetine apase-lengedelove lo lekeloni' mene neinako nemu' a'minguti' lingine mukito' nalo. 29 Ido' ti' lo nolo-lingimuve. Idise meloti' naza vaini gihile'mi novozouti' mo namo mino alinge' Me'neho gizebo o-lengedeline' gameneu' nene a'mine novozo atoli'mine nene lengikisi mino nalosune. 30 Ne'mine lavo mono' nama lisa limi heta igi Oliva gololo' dizi vani'.

Izesu' Aza Petolo' Eikumu' Ataize Lilingumu' Lo-ngimine' Gamazi

(Maleko' 14:27-31; Luka' 22:31-34; Zohane' 13:36-38)

31 Oliva gololo' dizi nizavo Izesu' ti' lo lo-ngimine': Mono' Godolou' O'moso'mo line' gamazi ma ti' li gizi nizani' ma neive: Gizebo ve'ine belekuvo sipisipi ize mulise nene hutile' igi vilisave. Ti' li gizi nizani' nenako nemu' idise holuka' lingine mukito' nenikumu' goloso giladi'mo huli-nidi vilisani'za 32 helekuvo O'moso'mo nele'mize otavo gomu' molo lengemo nGalilaia misubouko vo minelesuve. 33 Lavo Petolo' aza ti' lo lo-imine': Ingine muki' geikumu' goloso gili huli-gidi vilizanikisi naza nene mo keke' hulo-gedo vamolosuve. 34 Lavo Izesu' ti' lo lo-imine': Lamineto' nolo-gimuve. Idise holukakisi okoloho nolo olihe molamivo gaza gamene setohamo ataize lo-nedelesane. 35 Lavo Petolo' ti' lo lo-imine': O'ove. Ge gibili hili nesi nibili hililisa lilizanikisi nene ataize lo-gedamolosuve. Lavo Izesu' izipahala zuho mukito' Petolo' lidi'mine igi hamo' gamazivo' lani'.

Izesu' Gesemani Za Zuhou' O'mosola Lo Minine' Gamazi

(Maleko' 14:32-42; Luka' 22:39-46)

36 Ne'mine ogavo Izesu' aza izipahala zuhosi ebe' ma gulive Gesemani neu' vani'. Vo hetelo izipahala zuho ti' lo lo-ngimine': Naza holelo' vo O'mosola nololongumu' lingine melo' minilo. 37 Ido' ne'mine lo Petolokisi ido' Zebedaio' gipele sitakisi nene ngele'mizo novo Izesu' aza api' ogo muluno hukavo mulumo naba giline'. 38 Gelo ne'mine lo lo-ngimine': Naza mo mulu'neu' mulumo goloso ogo geni naba idi'mo heleloni' akalo' mine molokuve. Lingine makato' neni' olodi'mine igi melo' gizebo igi ningi minilo. 39 Izesu' aza ne'mine lo ngomo ma hoto'ile novo misubolo' golo hizo O'mosola nolo ti' lo line': Me'neho make, ha ilinido' neivo ma a'mine di soto' i-nidilisa nani' ekese' inite' nene nenita amilive lo do hulo-nedelinibo. Ne'mine ha olosaine'za neni' lu'nelo' do molamo asi gei' lukalo' do molozo. 40 Ne'mine lo Izesu' aza tine' molo ogo ningine' nene izipahala zuho okise ingi minani' nene ningo Petolo'ni ti' lo lo-dine': Nadive. Lingine amuzo milami neni' uvodi'mine igi makato' gamene li'nibe ngomo vanu aua ne'mine vetine ningi minamahe. 41 Lengemengu' milalizangu' nene gopo ikelizaze. Gizebo igi O'mosola li minilo. Ee, lutine ne'mo gono dalosa neiha okodine ne'mo nene geni o neive. 42 Ne'mine lo ihe' gohi vo O'mosola nolo ti' lo line': Me'neho make, gei' gelanivo a'mine di soto' i-nidilisa nani' ekese' inite' nene hulo-nedelido' amivo geheloni' o neivo ma gei' lukalo' do molo gehelesuve. 43 Ne'mine lo Izesu' aza tine' molo ogo ningine' nene ve'ine hihi' ogavo okise ingi nizavo ningine'. 44 Ningo ihe' hulo-ngedo vo O'mosola lo gomu' line' ma'mine ogo line'. Ne'mine ogo vo O'mosola line' nene gamene sitohamo ine'. 45 Ne'mine ogo ihe' izipahala nizada ogo ti' lo lo-ngimine': Okise ingi mine gililisa gili nizahe. Ningilo. O'mosolati' ve gihile neni' nene di soto' igi ve golosoliti a'ningu' milalizani' gamene mo ogaze. 46 Otilo. Mo volonge. Ningilo. Biluvalite dalizave lo neze do soto' ilive nene mo avito' ogave.

Zuda' Izesu'ni Do Soto' Molavo Dani' Gamazi

(Maleko' 14:43-50; Luka' 22:47-53 Zohane' 18:3-12)

47 Ti' lo nolo-ngimivo izipahala zuho tuvelu engikuti' nene ve gono'nibo Zuda' aza ogo heteline'. Ido' eveneto' medeli mini O'moso inite' lehizi-daa' ave nabasi mono' gizebo vesi mini evene' muki' ngimiselikevo bainati mitekisi gavososi dii Zudalesi maka' ani'. 48 Ido' olihe igi hetelami Izesu'ni do soto' o-ngidive ne'mo gomu' ti' lo lovo gize ngimine': Golo elo nalove nene a'mine ve mineleseize. Dalo. 49 Ogo hetelo Zuda' aza Izesu' neida lite' lo o-duvo Tisazo, ne nabe lo golo elo nani'. 50 Ne'mine ogavo Izesu' aza ti' lo lo-imine': Zogone, gaza ogo olosa aine' inite' nene alo' ozo. Ti' lo nolivo biluvalite ingine Izesu' neida igi analo' di minani'. 51 Ne'mine navo Izesulesi monaveuti' ve mali'mo ana do patelo bainati mite' gokuti' gelelehe' ogo eveneto' medelo mino O'moso inite' lehize-daa' ive naba'mi gelekele' izipe ma belo gala hela hasa' o huline'. 52 Hasa' o hulavo Izesu' aza ti' lo lo-imine': Bainati miteka nene ihe' daninguko do molozo. Evene' malike bainati mite' do lovo olosa ilinive nene ve malite bainati mitedunu' gibilikevo helelesane. 53 Gaza gelaine' me'nehida lokuvo alete mili-nidilizave ma ngimiselamilive lo gele nabe. O've. Lokuvo angelo' mulise naba ato ato' tuvelu ado' angelo' sevedi tu tauseni (72,000) ne'mine ivile' ogo ma ngimiselavo igi ha alete mili-nidilisave. 54 Ne'mino neiha ne'mine oloni' nene mono' godolou' nene a'nelo' di goni' i-nidi nibili hililizave li gizi nizani' gamazi nene ngelo gihile izamiline' nenako nemu' nene alete mili-nidilizavemu' lamolosuve. 55 Ido' a'mine gamenelo' Izesu' aza evene' mulise ti' lo lo-ngimine': Gizengize ve ma dalisa iga' adi'mine igi bainati mitekisi gavososi di neni' dalisa ahe. Naza gamene gamene mono' numuno nabau' mono' apize ngemaa' uvoni' malo' nene a'nelo' damani' nehe. 56 Gomu' ne'mine ami idise ne'mine navo soto' neine' nene O'moso'mi veleti' gamazi li soto' iga' ave polohete nete gizi nizani' gamazi ma gihile izelive losa nene soto' neive. Ne'mine lavo izipahala zuho Izesu'ni huli-di mukito' golise vani'.

Kanisoleliti Ve'nido' Izesu'ni Goni' I-dani' Gamazi

(Maleko' 14:53-65; Luka' 22:54-55; Zohane' 18:13-14, 19-24)

57 Ido' Izesu' analo' di minave ingine ele'mizi eveneto' medelo mino O'moso inite' lehize-daa' ive naba Kaiaha' neida vani'. A'mida Zuda vete mono' gozopotati' laa' ani' apizi ngimaa' avesi ido' Zuda veti gizebo ve'ine nesi mulise mili nizavo a'mingu' ele'mizi vani'. 58 Ne'mine navo Petolo' aza hoto'ile e'mete-do ogo a'mine eveneto' medelo mino O'moso inite' lehize-daa' ive naba ne'mi gesi mingu' ogo dizi minani' numuno nene vodo vodo ogo minavo oluso' omo' naba minido' nene dizo Izesu'ni goni' i-di nadi' i-dilizahe lo ningelesa pilisi vesi makato' minani'. 59 Ne'mino neivo eveneto' medeli mini O'moso inite' lehizi-daa' ave nabasi engi' kanisole'ine mukikisi nani lihimemu' Izesu'ni belelone li soza saza li lihime've li soto' ilizavemu' vise' ikevo 60 evene' muki' eze lihime ma li soto' ilisa igi soza saza gamazi lani'za ingine gilado' vo daline' gamazi ma lamavo eze lihime li soto' ilizave ma di soto' amani'. Di soto' ami vise' i'mi vi nizavo alinge' nene ve sita' ma igi ti' li lasine': 61 Me ve'mo na'nise'ne O'moso'mi mono' numuno naba nene ngu'voso gamene sitohamo ogo novivo ihe' gizelesuve lo live lasine'. 62 Ne'mine likesivo eveneto' medelo mino O'moso inite' lehize-daa' ive naba aza oto ti' lo line': Gaza nilasine' gamazilo' mene do velepe' izo lo-ngemeline' gamazi ne nomihe. Mene ve netise geikumu' nilasine' gamazi mene gelanivo nadi' o neive. 63 Ne'mine line'za Izesu' aza gamazi lamo minine'. Neivo eveneto' medelo mino O'moso inite' lehize-daa' ive naba aza ti' lo line': Idi'nise minevo' minevo' ogo minaa' ive O'moso'mi velelo' lo soto' ogo liline lo noluve. O'moso'mi gipele O'moso'mo do lu' izelive lo imiselelesa live nabe lo lemezo. 64 Lavo Izesu' aza ti' lo lo-imine': Mo ne laine'za lo-lengemeloze. Gililo. O'mosolati' ve gihile naza amuzo'vesi minive O'mosoloti' lemo nouvoni' nenako nemu' ana hulaa' ida mito' nouvo ningilisave. Ido' Okulumoto' limuso avilelo' nolimuvo ningilisave. 65 Ne'mine lavo eveneto' medelo mino O'moso inite' lehize-daa' ive naba ne'mo Izesu' aza O'moso ivile' olosa gamazi goloso lihe lo gala giline' nene ngelebizelesa asi've ngolokine' genegana've nene do nohikelo ti' lo line': Asi've O'moso ivile' olosa gamazi goloso laanako nemu' lihime've li soto' ilizavemu' nene nanimu' gohi vise' olone. O'moso ivile' o-do gamazi goloso line' nene langisetine mo gilikeve. 66 Nemu' lingine gilikevo nadi' o neive. Lavo ingine ti' li li-imani': Aza nene mo lihime naba danako mo helelido' ogave. 67 Ne'mine li golo veleu' gituho' i-di a'inedunu' bilii a'ine gatapa' gavoso bilani'. 68 Ne'mine igi nibili ti' li lani': Gei' neke O'moso'mo evene' do ngu' izeline lo gimiselelesa live nouve nolabe. Olo. Ne ma nigibilaze. Geze monovoka ningelone. Zaho gibilihe. Gaza polohetelite laa' adi'mine ogo lo soto' ogo lo-lemevo.

Petolo' Izesu'ni Ningamuve Ve Lo Ataize Line' Gamazi

(Maleko' 14:66-72; Luka' 22:56-62; Zohane' 18:15-18, 25-27)

69 Ne'mine igi nizavo Petolo' aza numuno vodo vodo minavo oluso' omo' naba minido' neivo gelekele' alu mali'mo eita ogo ti' lo line': Gaza nene nGalilaia misuboti' ve Izesukisi monaa' asive ma ne nolosane. 70 Lavo aza evene' mukiliti ve'nido' ataize lo nolaine' gamazi ne ma gelamuvongumu' nolane line'. 71 Ne'mine lo gesi gateda lemo novivo gelekele' alu gohi mali'mo ningeko evene' a'mida minave lo-ngimine': Me ve nene Nasalete numudati' Izesulesi monaa' ave ma ne neive. 72 Lavo gohi ataize lo line': O'moso'mi velelo' a'ne dizo noluve. Mo ningamuvemu' nilave. 73 nGomo lasolo ma nimini a'mida minave nete Petolo' neida igi ti' li li-imani': Engi' gamazi laa' adi'mino nolainako nemu' mo lamineto' a'mine zuhouti' nolosane. Gaza gamazi nolaine' ne'mo do soto' o-gedave. 74 Likevo aza gosoho' noluvo ma O'moso'mo usi' ize-nidivo lo mo lamineto' noluve line'. O'moso'mi velelo' lo huko noluve lo ti' lo line': Ningamuvemu' nilave. Petolo' ne'mine nolivo okoloho lite' lo nolo molani'. 75 Ido' okoloho nolo molavo Petolo' aza Izesu' okoloho'mo olihe nolo gedamivo nenikumu' gamene sitohamo ataize lo-nedelesane line' gamazi nene gohi gala gelo heta lemo vo ive nabalo' goloso ine' ve.